Sorbischer Schulverein e.V. Postplatz 2                            02625 Bautzen                e-mail: info@sorbischer-schulverein.de tel:03591/550216

Serbske šulske towarstwo z.t. je iniciator dwurěčneho kubłanja po metodźe imerzije w pěstowarnjach. Spočatk lěta 1998 přewza wone 1. pěstowarnju do swójskeho nošerstwa. Mjeztym ma SŠT sydom pěstowarnjow w Žylowje, Choćebuzu, Rownom, Němcach, Malešecach, Chrósćicach a Ralbicach jako swobodny nošer na starosći. Tuchwilu kubłuja so w nich 370 dźěći.

Někotři starši maja dale wobmyslenja, stož nastupa dwurěčne kubłanje. Přeněmčenje serbskich dźěći je jedyn argument přećiwo WITAJ-modelej.

Nałožowanje modela “WITAJ” pak zmóžni dźěćom z měšanych abo němskich swójbow našeje domizny nawuknjenje serbskeje rěče, a z tym polěpšenje jich kmanosće za zastup do serbskeje zakładneje šule. Tak mamy lěpšu šansu naše serbske zakładne šule jako žiwjenski rum zdźeržeć, w kotrymž so hišće wšědnje wužiwa serbska rěč.

W pěstowarni w Chrósćicach mamy samo tajki staw, zo sebi starši přeja poskitk němskeje rěče, dokelž doma němčina žanu rólu njehraje. Někotre hodźiny wob tydźeń z “němskej ćetu” maja hižo dlěši čas dobry wothłós pola staršich. Tež tu płaći: Jedna wosoba jedna rěč.